شاهد ميقدرش يشوف حاجة

أنا شاهد ومشفتش حاجة
بس أنا وسطيكم ولا حاجة
هزعق هصرخ مش محتاجة
أحسن لى أمضى بكل سذاجة
وأبصم ع اللى تقوللى عليه
وأنا جاهز يا سعادة البيه
هتقوللى السما لونها كرمبى
وأن حياتنا حلوة وبمبى
وأنك مش موجود هنا جمبى
وأنى أنا بفطر شاى وباتيه
والسجن اللى أنا فيه ده شاليه
رح أقوللك أحسنت يا بيه
هتقوللى الكون مليون قارة
وأن محافظة شبرا مجرة
وأن النملة فى بلاد بره
من ضمن الأخبار السارة
ناوية تكمل رقص باليه
رح أقوللك أيوه أمال ايه
هتقوللى شيوعى وسوفييتى
وأرض جدودى مش من بيتى
وإنى اللى قتلت نفرتيتى
والهكسوس كانوا م الفاميلية
هبصملك بالعشرة عليه
ولا تغضب يا سعادة البيه
هتقوللى عميل وتقول كاهن
وبأسرار بلدك بتراهن
وبتتمسكن وبتتداهن
للموساد والسى آى آيه
ردى عليك هيكون أوكى
بس تبطل ضرب يا بيه
أنا صاحب مذبحة القلعة
شفت المية هى ووالعة
والشمس من المغرب طالعة
والزبال بيلم زبالته
وطالع بالبدلة السينييه
وحياتك يا سعادة البيه
أنا طفل لحملة فرنسية
والمرحومة جات حامل فيا
وبمية سخنة ومغلية
جيت للدنيا متعرف ليه
قلت لنابليون يا أبيه
وأسأل اونكل شانزليزيه
أنا رحت لأمريكا يومين
شفت هناك برجين مايلين
رحت أعدلهم قمت شايلهم
قامو البرجين منفجرين
أخدت فى خاطرها بيونسيه
متأسف يا جناب البيه
أنا متأسف بس تسامح
بس تخلى فى شكلى ملامح
أعرف بيها ان أنا أنسان
مش لوحة أنت الفنان
ترسمها برسوم كروكيه
وأنا غلطان يا سيادة البيه
أنا كان مالى ومال الحق
أيه جرجرنى أنى أقول لا
آدى جزاه من قلبه يرق
ويفكر حاله أنه نبيه
ويعبر ع الل مخبيه
الرحمة يا سعادة البيه
الرحمة يا سعادة البيه