أنا مصرى

أنا مصري مصر أصيل ومصر دى أمي
أم الهرم والنيل دى في روحي وفى دمى
بلد الحضارة ومين يقدر يعاديها
دى جنودها لو نايمين تحمى أراضيها
تكرم ضيوفها بجد حتى اسألوا ضيوفها
وفى يوم وساعة الجد تمسك على كفوفها
في السلم تكسب ناس والحرب لعبتها
عمرك ما راح تنداس طول ما أنت ضيف بيتها
مصر اللى في القرآن ربك ذكرها كتير
بالعلم والإيمان دايما تقود الغير
مصر اللى لو نامت قول ع العرب أمين
وان فكرت قامت قولها على التانيين
بلدي أنا جنودها أحسن جنود الأرض
ليه اتكسر عودها والجبن أصبح فرض
بعتب عليكى يا بلدي والعتاب مردود
الظلم زاد على ولدى عدى الحدود بحدود
يا مصر ليه جنودك بيخافوا م التجنيد
وتركتى معبودك واهلك بقينا عبيد
يا مصر ليه خيرك رايح لغير أهله
لأولاد وناس غيرك والله ما يستاهلوا
يا مصر ليه صوتك معدش صوت مسموع
والناس تريد موتك من العطش والجوع
يا بلدي ليه سجنك مقفول في وش الغير
وحبستى أولادك وبقيتى سجن كبير
يا مصر ليه من حبك يصير إبليس
واللى يبيع أرضك مع إنه واطى خسيس
تديه دفا وإخلاص وإحنا اللى نخلصلك فرشة لحاف وخلاص
يا مصر فين علمائك الملايين
مشيوا وسابوكى لحالك المسكين
انتى اللى ربيتى وانتى اللى جبتى كتاب
ليه ينكروا فضلك والفضل للأغراب
يا مصر حالك يا بلدي بكت عليه جدران
وحتى حضنك لولدي معدش منه أمان
خايف عليكى يا بلدي من نومك المعسول
ويوم ما تصحي تلاقى باب مقفول
تصيحي وتقولي مين اللى قفل الباب؟!
يرد هاتف يقول لك الحياة بحساب
مين اللى سابك يا مسكينة في نومك ؟!
الباب قفل .... ومفيش ولا سرداب !