أمجاد يا عرب أمجاد

وطننا العربى الكبير الله يخليهولنا كده على طول يا رب رافع راس ولاده وموصلها بلوتو بإنجازاته اللى بتتكلم عن نفسها واللهم لا حسد تسمع فى كل دول العالم خلافات بين الرؤساء والحكومات لكن عند نا ولله الحمد الاتنين مع بعض زى السمنة على عسل لا وكمان حلالين عقد درجة أولى يعنى مثلا تلاقى فى اجتماعات جامعة الدول _المبنى مش الشارع_المشكلة قبل ما تتعرض تكون اتدرست واتناقشت واتلاقالها حل بعون الله أمال هنخيب ونعمل زى الأجانب اللى كل يوم مشكلة مرة يقفلوا السكة الحديد ومرة يقطعوا المواصلات عشان شوية دولارات لا راحت ولا جت ناس ماديين مش مقدرين إن المعنى الحقيقى للسعادة هو البساطة ولا شئ إلا البساطة وإحنا خير دليل على كده أبسط من كده متلاقيش والدنيا حلوة والحياة وردى وكله تمام والحمد لله ولا فساد ولا حيتان ولا رشوة ولا تزوير انتخابات ولا أى حاجة من دى خالص والمشاكل اللى بنسمع عنها بين شعوب العرب زعمائنا حفظهم الله كانوا قادرين يخلصوها فى ساعتها لولاش بس الشعوب منشفة دماغها حبتين وبعدين يقول لك الأجانب متقدمين علينا_ هما يستجروا _أمال اللى إحنا بنعمله ده كله لعب عيال . زمان كانت كلمة عربى لما تتقال فى أى مكان تهزه أما فى عصرنا الحالى العرب نفسهم مستغربينها وبيقولوا عليها كلمة بلدى خالص وعايزين مكانها واحدة من الجديد .
الناس فى بلاد بره اخترعت الصواريخ وطلعت القمر وإحنا تحت مسكتنالهمش اخترعنا.........اللبط ودهنا الهوا دوكو وعبيناه فى قزايز وقاعدين على حسهم نقول............................. أمجاد يا عرب أمجاد