عجيب أمر البلد دى كل شوية يطلعولنا بحدوتة جديدة وكل حدوتة أنقح من التانية ساعة يقولولك نشيل رمسيس وساعة نودى رمسيس قال يعنى رمسيس كان اشتكالهم وساعة شاغلين نفسهم بموضوع الكادر ياعم قول يا باسط ولا الموضة الجديدة اللى طالعين فيها اليومين دول يخصخصوا أى حاجة وكل حاجة بنك مصر عمر أفندى عبد المنعم مدبولى حتى التعليم مسابوهوش فى حاله وناويين يخصخصوه مع إن التعليم عندنا زى الفل قال يعنى هى ناقصة ومادام شايفين إن الخصخصة مفيدة قوى كده طيب ميخصخصوا الفول والعيش البلدى أهو على الأقل يرتفعوا بمستواهم شوية تخيلوا بقى الفول المخصخص هيبقى منظره أزاى عيش توست وزيت كريستال وحاجة ولا فى الأحلام ولا العيش لما يخصخصوه بدال ما كنا بنقف بالشهرين والتلاتة فى طابور العيش عشان بربع جنيه عيش بايت دلوقتى يطلع الواحد مننا الفيزا خبز بتاعته من الهاند باج ويدخلها فى البريد ماشين يطلعله من الناحية التانية عيش مولع كامل الأوصاف وكله توموتيكى توموتيكى أهو يريحنا شوية من حروب العصابات اللى بنسمع عنها كل يوم فى طوابير العيش وبعدها يدخلوا على الكنافة وأم على مهى الخصخصة مطلوبة برضه فى الشهر الكريم ولو نفعت التجربة يعمموها على الشعب المصرى يمكن الخصخصة تعمل معاهم اللى مقدرتش عليه مجانية التعليم ومادام الموضوع هيصلح البلد قوى كده ويعدل حالها المايل
فيا أهلا بالخصخصة
فيا أهلا بالخصخصة
ليست هناك تعليقات:
إرسال تعليق