أنا من البلد دى أنا من البلدى بلد أبويا وجد جدى بلد العيش بمساميره , والتنسيق وطوابيره ,
بلد الروتين والبروتين والعيشة المطينة بطين , بلد النزاهة والشفافية والبنوك المتشفية , بلد السحابة السودة والمستقبل البمبى والسما البتنجانى والأحوال المسقعة , بلد الباميا والكوسة وحقك اللى بتاخده وفوق منه بوسة , بلد الأموال المغسولة والمكوية والمتنشفة , بلد أطفال الشوراع وشباب القهاوى ورجالة ال...... ولا بلاش , بلد النيل والحال العال اللى ناسها يتمنوا توصلهم حتى مية المجارى وتبقى نعمة ربنا يديمها ويحفظها من الزوال , البلد اللى تاكل لحم كلاب ولحم حمير ومتقولش مياو , بلد الكائنات المنقرضة اللى تاكل قمح مسرطن على زيتون بضبغة الجزم ولبن ببودرة السيراميك والحلو عصير بالصراصير والصحة متقولش لعدوك عليها , بلد الكبد والكلى والقوانص وكافة الأعضاء البشرية اللى بتتباع على الرصيف لصاحب القلب الضعيف , بلد الفراخ البرازيلى والبيض الهندى والمحمول الصينى والمنتج اللى 100 % مصرى .
وكم فى مصر من المضحكات .
ومع أن طبيبى النفسى مانعنى من الكلام , خصوصا فى السياسة أو فى النظام عشان قفايا أتهرى أحترام , وعشان مرجعش باريس من جديد واتحط بين أسوار الحديد _ الشر بره وبعيد _ إلا أن الريحة فاحت والزبدة ساحت .
آخر تقارير الفساد فى المحروسة بتشير إلى أن معدل الفساد المالى فقط فى مصر وصل لقضية فساد جديدة كل دقيقتين على وجه التقريب والكلام رسمى وعلى لسان والحكومة _ هنعرف أكتر من الحكومة _ المعلومة فى حد ذاتها مش ذات أهمية لأنها واقع عايشه ومعايشه الشعب كل دقيقة لكن لما يكون الكلام حكومى وبتقارير كمان فده معناه حقيقة واحدة متقبلش النقاش إن حبايبنا الحلوين ما شاء الله قايمين بدورهم عشرة على عشرة ومن جد وجد ومن صبر هير وهنيالك يا واكل العيش بالكباب _وإحنا مش بنحسد إحنا بنقر بس _
وعشان يكون كلامنا موضوعى التقرير كان بخصوص الفساد فى الهيئات وبمعنى أصح فساد الموظفين وإحنا الموظفين يعنى الفساد مننا أحنا يا أخوانا ونرمى بلانا على غيرنا _ ده كلام _ واللى بيته من جنيه يتكلم على بتوع الدولارات ليه.
رسالة أخير ة للى ما يتسمى متقولش أيه أديتنا مصر؟!!!
شوف رصيدك فى بنوك بلاد بره وأنت تعرف .
ليست هناك تعليقات:
إرسال تعليق