ممكن

كل شىء فى الدنيا ممكن
مجنى يطلع جانى يمكن
جنى جوه خرم يسكن
مش بعيدة على الحياة
الإيمان يقلب ضلال
والحرام يكسى الحلال
واللى عنده تل مال
يعمل اللى فى مناه
الشيطان يصبح ملاك
والسلامة تصير هلاك
واللى كان عايش هناك
التراب يصبح سماه
ناس بتعلى وتوطى ناس
واحترامك بالمقاس
واللى معهوش بالمداس
ميلاقيش صاحب حماه
الفقير يصبح بكرش
والبرنس فى عرض قرش
وأحنا مالنا منتحشرش
يوم مع اللى عنده جاه
اللى يوم أصبح وزير
بعد ما شال الضمير
من كراماته الأمير
يعطى من ماله الزكاة
اللى شيخ منصر وتاب
واللى فى بنوك ليه حساب
واللى طول واللى غاب
بكره تركعله الجباه
شعبى يا مقهور يا شعب
ياللى سارح فيها لعب
ياللى راعبك كل رعب
ضربة من سوط الجناة
ولا لاقى لقمة حاف
ولا متغطى بلحاف
شعبى ليه أصبح يخاف
إلا من يوم ملتقاه
ماشى طالع فى مظاهرة
وانكسارته ف صوته ظاهرة
جسمه نام وعيونه ساهرة
م العلام اللى فى قفاه
شعب صار حاله يغم
م الظروف النص كوم
طول تاريخه يشيل فى هم
من بدايته لمنتهاه
بالقليل راضى وساكت
والكرامة عنده ماتت
والحروف فى لسانه باتت
بالخرس ربى ابتلاه
كله يسكت ع الكلام
والكتابة والسلام
والرسالة فى الختام
اللى يرفض يا شقاه