الحق ميزعلش

·                                 ‎ الناس شاغلة نفسها اليومين دول بموضوع اللى بيهربوا بفلوس البلد برة ويخلعوا ومش عارفين اللى فيها ايه يعنى لما راجل اعمال يهربله بمليارين تلاتة يعنى هى البلد هتشحت بعدهم ولا هتقدم على قرض فى الشئون الاجتماعية بنقولها وللمرة المليون يا اخواننا دول ناس غلابة وحالتهم تصعب على بتوع الخصخصة  وبيربوا مهربين ناشئين يتامى دول بيقضوا بقية عشاهم دليفرى اوعوا يغركم شوية البدل اللى بتشوفوها عليهم دى دول ماجرينها من المكوجى اللى على ناصية البيسيم وحتى لسه مدفعوش حقها وبعدين الفلوس اللى هربوا بيها من فلوس البنوك خاصة عندهم حق فيها بصراحة لان البنوك دى بتتعامل بالفايدة يعنى ربا ومن اعمالهم سلط عليهم وبصراحة البلد دى مبيعجبهاش العجب ساعة يقولولك نسفر الناس برة واما يسافروا يقولولك رجعوهم تانى منظرنا هيبقى أيه قدام الأجانب وبعدين الناس دى بتاخد الفلوس بتلعب بيها يعنى ولا بتقضى بيها أسبوعين فى الساحل الشمالى بتاع أمريكا لا سمح الله إطلاقا دولة بيلموها تبرعات لليتامى اللى فى بلاد بره ده المساكين هناك ياما بس هما بيحبوا يداروا الموضوع عشان الثواب ميضييعش وأنتوا سياد العارفين وبما أن الاعتراف بالحق فضيلة وبناء على ما تم من تصحيح للمعلومات المغلوطة بشأن هؤلاء الشرفاء الأبرياء علينا إن أحنا نعترف للناس دى إن إحنا غلطانين فى حقهم وكنا فاهمينهم غلط مش عشان ياخدوا بالهم من فلوسنا اللى فى بنوك سويسرا ولا حاجة لكن عشان ده حقهم 

                                     والحق ميزعلش