قصة ف غاية الغرابة
والبطل فيها برنس
كلب لكن عنده يابا
خدامين من كل جنس
كلب ريس مش كلام
ابن عز وعزه باين
لا ومتعلم علام
مش مصدق شوف وعاين
خدامين من نسل آدم
شغالين للكلب عضم
فجأة تلقى ألف خادم
لو حصل له عسر هضم
يجروا جاريين ع الدكاترة
تنقلب حالة هياج
البرنس ف حالة خطرة
اشتروا أحسن علاج
أصروفوا وميهمكوش
نزلوه أحسن عيادة
جهزوا كل الجيوش
تحت طلبات السيادة
ده البرنس علينا غالى
أغلى من كل الأمانى
ده أحنا نسهر له الليالى
بس يرجع لينا تانى
يا طبيب لو يوم ألمته
احتسب نفسك شهيد
وأما يتداوى بسلامته
تبقى مصر اليوم ف عيد
تشريفات وكتير مراسم
تمثيلات لبلاد بعيدة
واحتفالات ف المواسم
فرحة بالعودة الحميدة
فى مقدمة الصفوف
بعد تفتيح البيبان
تمشى قدامك تشوف
أمبراطور اليابان
والسفير الأمريكانى
والفرنسى الدبلوماسى
والمثقف الفلانى
كله قاعد ع الكراسى
كله يبهنى بقلبه
كله بيوزع هدايا
بهجة بالريس وكلبه
من قبيل حسن النوايا
هى دى الليلة الكبيرة
هى دى الفرحة بجد
هو ده الأنجاز بعينه
حد عدى أى حد
أما بخصوصك سعادتك
طظ فيك وف كل أنس
يا جمالك يا سعادتك
ياللى من عيلة البرنس
