سلـم وعالـي وآخــره إيــه يا جــدع
توصــل نهايتــه تلاقــي كــل البــدع
لكــن حــذاري سلـمك مــن خشـب
يا تــراعي فيـن خطوتـك يا إمـا تقـع
محمود هاشم
الجمعة، 30 ديسمبر 2011
أنــا البــريء فــي الدنــيا لمــا اتولــد
أنــا البــريء فــي الدنــيا لمــا اتولــد
أنـــا المحــــــبة والعطــــاء والجـــــلد
أنــا اللـي عايــش فيـها يزرعـها خــير
محصدش غير شرها وبسوطها اتجلد
محمود هاشم
في يوم مشيت ع الأرض قمت عترت
في يوم مشيت ع الأرض قمت عترت
لمـــا التفتــــت لفوقـــي لمــا ســرت
بصيــت لتحـت خبــطت فــي مجــهول
ومشيـت عدل شفـت الطريق واخترت
محمود هاشم
مقفول يا باب الحظ ليه في الوش
مقفول يا باب الحظ ليه في الوش
كل أمـا أقـولك هات تقـول معلـش
الحــــظ قــــال أرزاق ومقســـومة
ربـــــك ولا بيظلــــــم ولا بيغــــش
محمود هاشم
الاثنين، 26 ديسمبر 2011
قاللي طبيبي الضحك موت للقلب
قاللي طبيبي الضحك موت للقلـــب
والحــزن برضـــه ينـــــهكه ويعييـــــه
قلت لطبيبي أنا قلبـي نابـض صلــب
ولا ضحـــك ولا أحــــزان تأثـــر فيــــه
محمود هاشم
السبت، 24 ديسمبر 2011
ولدي ولا تخاف من شيطان أو بشر
ولدي ولا تخــاف من شيــطان أو بشــر
ولا يــوم يهــزك صـوت رصـاص أو حجـر
إن عشــت عيــش حــر وكرامـتك فـوق
وإن مــت مـوت واقـف كمــوت الشجـــر
محمود هاشم
الجمعة، 23 ديسمبر 2011
لما يتهان الشرف
لمــا يتهـــان الشـرف واللسـان مربــوط بقيـــد
لــما تتـــــعري الكـــرامة تحت أســوار الحــديد
وأمـا ننــداس بالبيــادة وإحـنا برضـه مخروسين
يبقـي نسـتاهل قيــودنا ونستحق نكون عبــيد
محمود هاشم
يسألوني ليه أحبك
يســـألوني ليه أحبـــــك وأنتي حبـــك في الكيــــان
حـــب ســاكن جـوه قلبــي وف عروقــي من زمــان
حبـك إنتــي يا مصــر عندي أغلــي من كــل الكنــوز
وإيه هعوز غير إني أشوفك رافعة راسك في العنان
محمود هاشم
وإيه هعوز غير إني اشوفك رافعة راسك في العنان
الاثنين، 12 ديسمبر 2011
24 ساعة احتجاز
لما طيور الشمس تغرب في النهار
وأما خفافيش الظلام تملي الجدار
وأما نسيم الصبح يتحول جحيم
تعرف غبار الاحتجاز كشف الستار
_____
لما الدقيقة اللي بتفوت ع السجين
جوه الحديد
تمشي كمشي السلحفاة وسط الصحاري
تايهة بتدور علي جبل الجليد
تعرف أكيد
إن أنت محبوس احتجاز
______
بس العجب
إنك تكون مجرم سجين جوه القفص
من غير سبب
وملكش حق الاعتراض
إنت أساسا جاي عشان الاعتراض
______
عامل مناضل ثوري بتسوق في العناد
وتلم حواليك الولاد
داير تقول إن البلد فيها فساد
فين الفساد
يا عميل يا تربية الموساد
______
أكتب يا كاتب إنه حاول الانقلاب
ليلتك هباب
هتشوف معانا كل ألوان العذاب
رح تعترف رح تعترف
أرحم دماغنا واعترف
تكسب ثواب
______
خايف عليكوا من اعترافي خايف
أصل اعترافي في الحقيقة مر
وأنا لو شكيت وحكيت علي اللي شايف
هيكون كلامي ليكوا مش هيسر
______
عش العصافير سكنته الغربان
والأرض صبحت بور بلا زرعة
فوقك غراب وتحتك الغيلان
لو كنت يوم عصفور
فكيف تسعي ؟!
______
وإحنا عصافير عايشة في غابة
وأنتوا ملوك الأمر والنهيان
لكن حذاري الدنيا قلابة
وف طبعها تسلط
أبدان علي بدان
______
وهييجي يوم ع الغراب
ويشيخ ويصبح رماد
وعلي جثته العصفور
رافع لفوق راسه
والعشة فوق الشجر
ترجع لحضن الولاد
ولا حد فوق التراب
يقدر علي مساسه
محمود هاشم
الاشتراك في:
الرسائل (Atom)